Святые священномученик Киприан и мученица Иустина. Житие, служба, акафист - стр. 6

Иглаида сей [Аглаидас] же етер, именем схоластик, добра рода и богат зело, губитель образом; устрашен же о идольстей льсти, зря святыя девыя ходяща часто в церковь, восхоте ей, и слаша к ней мужа многы о воле жены вопраша о посаждении. Святая же, всем досаждающи, отсылашет я, глаголющи: «Уже аз обручена есмь Христу». Он же, собрав народ, и восхоте ей сотворити нужду. Сущей же с нею сотвориша кличь велик, зваху сущая в дому ей. Они же, услышавше, притекоша со оружием отгнаша я. Сам же одержим сы похотию, обиат девицю и удержа ю. Святая же дева, сотворши знамение Христово, поверже и възнака[45] на землю, и пхающе ребра и лице ему окровави, ризы ему разтерзавши, постави и срамна, подобно сотворивши учителница своеа Феклы[46], и тако иде в церковь.

Аглаидас же разгневався, приступль к единому волхву, именем Киприану, и обеща ему вдати злато и сребро два таланта, да уловит святую деву, аще может, волшвением своим; а не ведый окаанный, яко непобедима есть сила Христова. Киприан же сжалиси о уноши, призва волшвением своим беса, и шед демон и рече: «Чего ради призва мя?». Он же рече к нему: «Уноша возлюбил есть девицу от Галилеи; можеши ли ми ю предати?». Оканный же бес, егоже не имый, яко имый, обещася. Киприан же рече к нему: «Повеждь ми дела твоя, да ти веру иму». Демон же рече к нему: «Преступник бых Божий, послушав отца моего, небеса смятох, ангелы с высоты сведох, Евгу прельстих, Адама рая лиших, и Каина убийству научих и землю кровми оскверних, терние и волчець прозябе мене ради, позорище собрах, преблудодеяние приготовах, ругание сотворих, люди Иизраилевы научих идолом служити, и научих же ея поклонитися телцю, и навадих я пропяти Христа, грады потрясох, стены развергох, домы разделих; си вся сотворь, како могу явитися зол ея ради? Но приими чары сиа и просыпли окрест храма ея, да аз пришед наведу ум отца моего на ню, и абие послушает тебе».

Святаа же дева воставши в третий час нощи, воздааше молитвы Богу; очютивши же стремление демоново и ражжение сердца, возре к Владыце своему, и знамением и. силою крестною знаменавше все тело, гласом велиим рече: «Боже Вседержителю, Отче земнаго отрока Твоего Иисуса Хрт. ш, погружей человекаубийца змиа в бездне огненей и спас уловленыя им, прострый небо и утвержей землю, просвещей солнце и луну сотворь светлу, создавши человека по образу Своему, введый в рай пища, да наслаждается твари бывшая Тобою прельщением змиином оземьствована[47], неси его оставил, Человеколюбче, но силою Креста Твоего возратил еси Иисус Христом, Имже весь мир просвещен бысть. Вся знают Тя, Бог сущий надо всеми; Ты, Господи, и ныне спаси рабу Свою глаголом Твоим и да не прикоснется мне напасть; Тебе бо обещахся девьство сохраните Единочадому Иисусу Христу; Тя бо возлюбих всем сердцем своим и всею крепостию моею, Иисусе Христе, Ты бо вожже светилник душа моея любовию Святаго Твоего Духа; тем же молюся Тебе: не дажь мене в руце губителю и не ослаби мене, да не преступлю обетованиа, еже к Тебе, но отжени от мене советник злу бес». И си рекши, все тело свое знамением Христовым знаменавши, и дуну на демона, и посрамлыии отгна и. Бес же посрамлен пришед ста пред Киприаном. И рече к нему Киприан: «Где есть, по ню же тя послах, что аз бдех, а ты не улучи?». Демон рече: «Не вопрашай мене, яко не могу ти глаголати: видех бо етеро знамение и убояхся отбежах». Киприан же призва, поругався ему, крепльшаго беса своим волшвением. Пришед же и той, рече: «Киприане, чюх повеление твое и оного злобу; тем же посла мя отец мой диавол исправити печали твоя; но приими чары сиа и посыпли окрест храма ея, да аз пришед вдам ти ю». Сотвори же Киприан тако, и иде демон к деве. Святая же дева, востав в шестый час нощи, молитву свою воздааше Богу, глаголющи сице: «Полунощи востах исповедатися Тебе о судьбах правды Твоея, Боже всех милости, небесным законе, и превышним хранителю, и подземленым страшне, посрамль диавола и возвеличий жертву Авраамлю, свергий Вила и убив змиа, и отроком своим знаны