Святые священномученик Киприан и мученица Иустина. Житие, служба, акафист - стр. 5

БЛАГОСЛОВИ ОТЧЕ![43]

Явлению бывшу с небесе на землю Спаса нашего Иисуса Христа, пророческим словесем бывшим вся поднебесная просвещена бысть, словесем верующим в Един Бог Отец Вседержитель и в Господь наш Иисус Христос, крещающеся о Святем Дусе. Бе же етера[44] дева, именем Иустина, Едесиа отца, матере же Клидониа, в граде же Антиохисте, сущим близ Дафана. Та в храмине своем при оконци седши, послушаше етера диакона, именем Праулея, глаголюща величиа Божиа, вочеловечение Господа нашего Иисуса Христа проповедающе, пророчество и рожество еже от Девы Мария, и поклонение волхвом, и явление звезды, и славословие ангельско, силу же креста и знамением и чюдесем бывающим, и воскресение еже из мертвых, и явление еже ко учеником, и завет еже к ним, и вознесение еже на небеса, и седение еже одесную Отца, и нераздрушимое Царство Его.

Си словеса слышавши, паче зревши оконцем, святая дева глаголемых диаконом, не может терпети ражжением Святаго Духа, но хотяше видети лице диаконе, и не могущи видети, рече матери своей: «Мати, послушай дщере своея, ничто же суть, имже по вся дни покланяемся: идоли бо суть, древяни босуть и сребрени и злати, и костьми животных руками человеческыми сотворени, на ня же, аще един приидет от Галилеи, без руки человечески словом и молитвою вся победит». Она же гордынею премудрости покровена сущи, рече: «Чадо, да не очютит отец твой совета твоего». Рече же блаженная к ней: «Весто да будет тебе, мати, и моему отцю, яко аз Христа ищу, проповедаемаго суседом моим Праулом, увидех бо о нем послушающи на многы дни, яко несть иного Бога, о Нем же ны ся есть спасти».

Си рекши отъиде, особь творящи молитвы к Богу. Мати же ея в нощи на ложи все поведа мужю своему. Бдевша же о себе много и посем уснувша в сласть, видеста во сне, яко ангельско воиньство прииде на ня в храмину боле ста с свещами горящими, глаголюще: «И Аз дам вама Царство Божие». Видев же Едесий, ужасен быв, утро востав рано, поим жену свою и дщерь, иде в церковь с Праулом, и моляхут и, да доведет як епископу Ептату [Оптату]. Сотвори же диакон тако, послушав его, и припадше к ногама епископу, молиша его, да даст им Христово знамение. Епископ же не хотяше, дондеже поведа ему явление Христово и желание девица, иже имяше Христа ради. Едесий же постриже власы главы своея и браду, бе бо иерей идольскый, припадше к епископу, приаше знамение Христово. Едесий же сподоблен бысть чину прозвитерьскому; пребысть же в нем едино лето и шесть месяц, почи с миром. Святая же дева хождаше часто в церковь.