Святые священномученик Киприан и мученица Иустина. Житие, служба, акафист - стр. 9

Пророческым словесем сбывающимся и словесем Господа нашего Иисуса Христа осеянней пшеници, плевелом же множащимся, толику же стаду отпадшю от веры и людем расточеном бывшем, святый Киприан книгами своими вся исправль во всех градех, многы же отторже ото льсти диаволя. Старый враг змий с своими слугами наустив толми князя с людми области восточными, глаголя, яко Киприян учитель христианеск разаряет славу бог[ов], волхвует же с етерою девою Иустиною и развращает всю восточную и всю вселенную книгами своими. Князь же разгневався зело, повеле связавше святаго Киприана и святую Иустину вести сохранно в Дамаск. Приведенома же има бывшема, вопроси князь Киприана: «Ты ли еси учитель христианеск, уловлей иногда многыи в славу бог[ов], ныне же чарми Распятаго развращаеши слух человеком, лучша творя Распятаго живых бог[ов]?».

Святый же Киприан рече к нему: «Окаанне, како ся ставил еси гневом диаволим, богатьством и гордынею! Аз 6о, якоже рече, уловлен древле бых диаволом и омрачен мудростию еллинскою, и многы убих, многы же сотворих блуд творити; но спасе мя Христос сею девицею. Схоластик 6о етер Аглаидас, сый от Клавдиа, восхоте пояти жене, но не послуша его до сего времени; он же не успев ей ничтоже, прииде ко мне, да ю прельщу, моля ми ся прельстити ю любезными чарми. Аз же надеяхся книгах волшебных, послах на ню демон, и иссуши и знамением; послах же и другаго и третиее, сииречь самого князя бесом, и такоже победи тем же знамением крестным. Аз же потщася уведети знамениа силу, заклен демона. Демон ужагаем ангелом Божиим, изглагола ми все; сице же глагола: "Яко в сей злей вещи приобретник бе". Тогда аз возникнув от льсти тоя, книгы волшебныя принесох к древнему мене епископу, сожже я предо мною и пред всеми гражаны. Тем же и тя молю, отступили] от гнева идольскаго и прийти в дом Божий, идеже Христос благоверными славим есть, и тогда разумевши непобедимую силу Христову».