Услыши молитву раб Твоих. Молитвы, канон и акафисты, чтомые при онкологических заболеваниях - стр. 3
Господи, да не я́ростию Твоею обличи́ши менé, нижé гнéвом Твоим накáжеши менé. Яко стрéлы Твоя унзóша во мне, и утверди́л еси на мне рýку Твою. Несть исцелéния в плóти моей от лицá гнéва Твоего, несть мира в костéх моих от лицá грех моих. Яко беззакóния моя превзыдóша главý мою, яко брéмя тя́жкое отяготéша на мне. Возсмердéша и согни́ша раны моя от лицá безýмия моегó. Пострадáх и слякóхся до концá, весь день сéтуя хождáх. Яко ля́двия моя напóлнишася поругáний, и несть исцелéния в плóти моей. Озлóблен бых и смири́хся до зелá, рыкáх от воздыхáния сéрдца моегó. Господи, пред Тобою все желáние мое и воздыхáние мое от Тебé не ута́ися. Сéрдце мое смятéся, остáви мя сила моя, и свет óчию моею, и той несть со мнóю. Дрýзи мои и искреннии мои пря́мо мне приближи́шася и стáша, и бли́жнии мои отдалéче менé стáша и нуждáхуся и́щущии дýшу мою, и и́щущии злáя мне глагóлаху сýетная и льсти́вным весь день поучáхуся. Аз же яко глух не слы́шах и яко нем не отверзáяй уст своих. И бых яко человек не слы́шай и не имы́й во устéх своих обличéния. Яко на Тя, Господи, уповáх, Ты услы́шиши, Господи Боже мой. Яко рех: да не когда порáдуют ми ся врази́ мои: и внегдá подвижáтися ногáм моим, на мя велерéчеваша. Яко аз на раны готóв, и болéзнь моя прéдо мнóю есть вы́ну. Яко беззакóние мое аз возвещý и попекýся о гресé моем. Врази́ же мои живýт и укрепи́шася пáче менé, и умнóжишася ненави́дящии мя без прáвды. Воздаю́щии ми злáя возблагáя оболгáху мя, занé гонях благосты́ню. Не остáви менé, Господи Боже мой, не отступи́ от менé. Вонми́ в пóмощь мою, Господи спасéния моегó.
Сла́ва Тебе́, Го́споди Иису́се Христе́, Сы́не Единоро́дный Безнача́льного Отца́, Еди́не исцеля́яй вся́кий неду́г и вся́кую я́зю в лю́дех, я́ко поми́ловал мя еси́ гре́шнаго и изба́вил еси́ мя от боле́зни моея́, не попусти́в ей разви́ться и умертви́ть меня́ по греха́м мои́м. Да́руй мне отны́не, Влады́ко, си́лу тве́рдо твори́ть во́лю Твою́ во спасе́ние души́ мое́й окая́нной и во сла́ву Твою́ со безнача́льным Твои́м Отце́м и Единосу́щным Твои́м Ду́хом, ны́не и при́сно и во ве́ки веко́в. Ами́нь.
Молитвами святых отец наших, Господи Иисусе Христе, Сыне Божий, помилуй нас.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.