Домострой - стр. 2
ГЛАВА 4
КАКО ЛЮБИТИ ГОСПОДА ОТ ВСЕЯ ДУША; ТАКОЖ И БРАТА СВОЕГО И СТРАХ БОЖИЙ ИМЕТИ И ПАМЯТЬ СМЕРТНУЮ
По сем же возлюби Господа Бога своего от всея душа своя и от всея крепости своея; и подвигни вся дела твоя и обычаи и нравы угодная творити[1] Господеви. Паки же искреняго си возлюби: и всякаго человека по образу Божию созданнаго, рекше: всякого христианина. Страх Божий всегда имей в сердце своем и память смертную и любовь не лицемерную ко всем; всегда волю Божию твори и по заповедем его ходи. Рече бо Господь: в чем тя застану, в том тя и сужду; того ради достоит всякому[2] готову быти в добрых делех; в чистоте и в покаянии, и во всяком исповедании, всегда чающе часа смертнаго[3]. О том же. Возлюби[4] Господа от всея душа и страх его да будет в сердце твоем; праведен буди и истен[5] и смирен; очи долу понича, ум же к небеси простирая, умилен к Богу, и к человеком приветлив. Печалнаго утеши; терпелив в напастях, и недосадитель всякому человеку, – щедр и милостив; и нищим кормилец[6], и странноприемник; скорбен греха ради[7]; весел о Бозе; алчен буди от обядения и жажден ото пьянства; кроток не славохотен[8] не златолюбец, но друголюбец; не горд; боязнив пред царем, готов в повелении его; во ответех сладок; частомолитвенник; разумен трудник к Богу, и не осудник всякому человеку; поборник обидимым; нелицемерен; чадо Евангелия; сын воскресения; наследник будущия жизни о Христе Исусе Господе нашем[9], ныне и присно и во веки веком аминь.
ГЛАВА 5[1]
КАКО ЦАРЯ ИЛИ КНАЗЯ ЧТИТИ И ПОВИНОВАТИСЯ ИМ ВО ВСЕМ И ВСЯКОМУ ВЛАСТЕЛЮ ПОКАРЯТИСЯ И ПРАВДОЮ СЛУЖИТИ[2] ВО ВСЕМ И К БОЛШИМ, И К СРЕДНИМ[3], И К СКОРБНЫМ И МАЛОМОЩНЫМ, И КО ВСЯКОМУ ЧЕЛОВЕКУ, КАКОВУ БЫТИ, И СЕБЕ О ВСЕМ ВНИМАТИ
Царя бойся и служи ему верою, и всегда о нем Бога моли, и ложно отнюдь не глаголи пред ним; но с покорением истину отвещай ему, яко самому Богу, во всем повинуйся ему. Аще земному царю правдою служиши, и боишися его, тако научишися и небеснаго Царя боятися: сей временен есть, а небесный[4] безначален и безконечен и судия не лицемерен: и воздаст комуждо по делом его. Також и князем покаряйся, и должную честь воздавай им, яко от него посланым, во отмщение злодеем, в похвалуже добродеем. Князю своему прияй[5] и властелем своим, ни по мысли нань зла. Глаголет Павел апостол: вся владычества от Бога учинена суть: да – аще кто противится властелем, то Божию повелению противится. А царю и князю и всякому велможе не тщися служити лжею и клеветою и лукавстом; погубит Господь вся глаголящая лжу. Аще[6] ропотники[7][8] и клеветники от народа прокляти суть. Старейшем себе честь воздавай, и поклонение твори; средних яко братию почитай; маломощных и скорбных любовью привечай[9], и юнейших яко чада люби, и всякому созданию Божию не лих буди. Славы земныя ни в чем не желай[10] вечных благ[11]проси у Бога; всякую скорбь и тесноту со благодарением терпи; обидим не мсти; хулим моли; зла за зло не воздавай; ни клевет за клевету; согрешающая не осуждай; воспомяни своя грехи и о тех крепко пекися; злых мужей совета отвращайся буди ревнитель правоживущим[12] и тех делания написуй в сердцы своем, и сам тако же твори.